靠父幹又如何？王子涵浮沉10年開竅
藝人王子涵早年曾揚言不靠爸爸導演王晶父蔭，更有傳接拍三級片盡地一煲！惟入行10年的她坦言心態已轉變，不再執着於外界抨擊而與爸爸鬥氣，並重提當年被拍得洽談三級片一事，鬧爆有人設局陷害做新聞，澄清從沒接拍計劃！
入行多年，王子涵（Ada）至今依然被稱為「王晶個女」，她直言最初對「靠父蔭」三個字非常反感，但現在長大了，經已看開：「好多嘢都睇化咗，靠爸爸係一條路，唔靠爸爸又係另一條路，咁當然唔係咩都要靠佢，當佢想幫而我又有需要，咁咪畀佢幫，唔使講到一定唔靠爸爸嘅！有時遇到困難又死硬頸話靠自己，只會永遠喺困局入面出唔到嚟。」
王晶唔偏私
近年她先後參與多部由爸爸監製的劇集，包括《荷里活有個大老千》及《賭城群英會》等，她強調爸爸絕無偏私：「每次拍完場戲甚至作品出咗街，佢都會同我檢討，有次畀佢鬧得好勁，好唔開心，但嗰次真係令我喺演戲上有少少開竅，幫到我好多。」雖然她對「靠爸爸」態度軟化，但至今仍對當年被指拍三級片一事未能釋懷，她覺得有人刻意安排做新聞，但相信與該片導演劉國昌無關，並藉此機會向對方致歉。
冇畀人催婚
即將踏入29歲，Ada表示會繼續保持童心，輕鬆面對，現時她專注事業，幸家人未有催婚，她亦明白成家立室責任重大，待有能力照顧自己時再作打算。未來她會繼續多方面發展，除了來年網店生意有新動向，亦會努力學習唱歌跳舞增值自己。
場地：Hygge Cafe & Bar