紐約時裝周前晚舉辦Harper's Bazaar ICONS派對，一眾名人紅星包括Kendall Jenner與Bella Hadid等盛裝出席，其中美國饒舌天后Cardi B竟然當眾向前輩Nicki Minaj「開拖」，Cardi更在混亂中被打到額角紅腫！
有目擊者指25歲的新紮天后Cardi先向35歲的Nicki「挑機」，當時Nicki與工作人員坐在一枱， Cardi則氣沖沖走向對方，然後說：「等我同你講啲嘢。」正當她想對Nicki有所行動時，即被保安人員阻止，但她繼續發難，脫去紅色高踭鞋怒掟Nicki，但被保安築成圍牆擋住，相反Nicki全程冷靜冇動火。
期間保安將二人隔開，有知情者指Cardi仍嘗試向Nicki動手。有傳混亂中，有保安用手肘擊中Cardi左額，即令其額頭「起樓」！最後搞事者Cardi被保安帶走，並赤腳離開，亦有指她被整甩一大撮假髮，期間她的助手執起並帶走。至於她留下的高踭鞋，有人聽到Nicki的工作人員表示會留作紀念。
事後熟悉Cardi的人士表示，她過枱並非撩交打，只想澄清Nicki散播有關她的謊言。而Cardi方面相信Nicki的保安早有部署，若她走近即有所行動。她亦於社交網發長文爆粗鬧Nicki，自稱忍對方好耐：「我由你呃我，我又由你砌我生豬肉……但當你提及我嘅孩子，你就選擇評論我點做母親，評論我照顧我女兒嘅能力。我努力工作，唔想任何人搞臭我嘅成功！班八婆喺歌裏面講到自己點Ⅹ勁，但現實生活中就係冇膽匪類！」