不少知名諧星如占基利（Jim Carrey）與羅賓威廉斯（Robin Williams）等都被抑鬱症困擾，嚴重的甚至因此結束自己生命。他們比誰都明白，為何小丑臉上永遠畫上眼淚。
占基利曾經是荷里活喜劇之王，不過深受抑鬱症困擾。他於2004年受訪時表示有一段時間要依賴抗抑鬱藥百憂解（Prozac）：「我食咗百憂解好耐，佢或者幫到我脫離低潮一陣，但好多人戒唔甩佢。我到一個地步要唔再食佢，因為我明白到，其實一切都係OK。人生有高峰，亦有低谷，但佢哋都被磨平，令你覺得自己處於好低程度嘅絕望。」
舊愛Cathriona White於2015年自殺，其家人入稟指控占害死她，又傳她性病，最後占獲證清白。已經半退休狀態的占，經歷連串困擾後，似乎看破世事，去年受訪時語帶禪機：「抑鬱同悲傷嘅分別，悲傷係受有發生或冇發生嘅事情影響，抑鬱係你個身體同你講X你，我唔想再做呢個角色，我唔想再維持呢個你喺世界創造嘅形象，我已經受唔住。你可以將『Depressed』（抑鬱）想像為『Deep Rest』（深度休息）。你個身體需要抑鬱，佢需要一個深度休息，唔再勉強做你所嘗試扮演嘅角色。」他形容自己已超越抑鬱，現在偶爾可以感到快樂：「呢一刻，我再冇抑鬱，我再冇呢個體驗。我有咗佢好多年，但依家，如果心靈要落雨，佢係會落雨，但唔會長落，佢唔會落雨落到浸親我。」
另一位著名喜劇演員羅賓威廉斯於2014年8月11日在加州寓所吊頸自殺，終年63歲。他生前受抑鬱症、焦慮症、妄想症與路易體病折磨。他承認曾因情緒問題而酗酒濫藥，但未正式承認過有抑鬱症：「我有時表演時係咪進入亢奮狀態？係！我係咪成日都咁亢奮？唔係！我會唔會唔開心？梗係會！係咪好嚴重？梗係！」戒酒後，心魔仍然存在：「心魔仲喺度，把聲會話：『你係垃圾，你乜都唔係，係聽到我講嘛？』佢仲喺度，信我。」