袁偉豪減磅過度左腳腫晒
藝人袁偉豪昨午到鑽石山為寫真集舉行簽名會，一臉倦容的他透露新劇《鐵探》已煞科，不過由於連月來減磅，身體出現少許問題：「好似水腫咁，隻左腳腫得犀利咗，可能呢幾個月飲食走鹹，依家正常番，未能一下子適應。」
談到已休息一星期，他直言仍身心疲憊：「煞科去咗婆婆屋企食住家飯，真係好開心。（有胃口？）食到好多嘢，可能就係咁出事。依家開始約朋友飯聚，大家都話我瘦，原來呢幾個月真係變咗好多。」至於早前明言會與家人去旅行，他表示計劃中：「本來想去日本，但可能要轉地點。（帶埋女友？）會，我一個帶6、7個（女性），包括媽媽同阿姨咁，考驗吓自己能力，亦還佢哋心願，好多謝阿姨呢幾個月幫我陪住媽咪。」