朱晨麗「跛腳」收場小劇迷急探病
藝人朱晨麗首部孭飛的劇集前晚大結局，同劇演員齊齊打邊爐煲劇。對於悲劇結局睇到眼濕濕，朱朱笑指有朋友的囡囡非常「入戲」，以為她真的受傷入院，還嚷着要立刻動身探病，令她哭笑不得。
朱晨麗、譚俊彥（Shaun）、傅嘉莉（Kelly）和關楚耀演出的無綫劇《特技人》結局有悲有喜，雖然有情人終成眷屬，Shaun向朱朱求婚成功，感動落淚的她還甜蜜咀爆Shaun，Kelly與關楚耀也在海灘情深一吻，不過「復出」當特技人的朱朱拍攝飛車戲時發生意外，車子沿崖邊滾落山，Shaun欲救無從，其後眾人合力救出受重傷的朱朱，最終交代她要以輪椅代步，悲劇收場。
盼再合作
朱朱前晚相約Shaun、Kelly、關楚耀和歐陽巧瑩等打邊爐睇大結局，席間無論男女均睇到眼濕濕，朱朱受訪時說：「實在唔捨得，好懷念拍嗰時嘅默契，希望原班人之後有機會再合作。睇到好多網民留言話Sad Ending覺得唔開心，因為我跛咗要坐輪椅，好失望咁，我朋友個女仲誇張，睇到我行唔到嗰場戲，仲同佢媽咪講話要即刻去醫院探姨姨，真係睇得好投入，證明套劇成功，我都好開心！」
心情矛盾
忙為新劇《多功能老婆》埋尾的她透露心情矛盾，因連日來通宵拍攝非常辛苦，但同劇演員相處融洽，令時間過得特別快兼很順利，如今終點在望卻有點不捨。