王君馨唔敢順產生B
藝人薛家燕將於12月舉行個唱，前晚更邀得好友曾江及胡楓（修哥）30多人，雲集電視城錄節目《家燕姐全民皆Friend 60年》。家燕坦言緊張到失眠：「所有嘉賓都係親自請，碌爆人情卡。」滕麗名表示當年拍《真情》時，對薛家燕望而生畏：「嗰時我係新人，但成日要同家燕姐拍抱頭痛哭嘅戲，最誇試過NG4、5次，又畀PA鬧，幸得家燕姐出口相助。」而王君馨則大讚好姊妹鍾嘉欣近日在家產子相當勇敢：「佢成日叫我哋要順產，相信嚟緊李亞男會聽佢講。我就好驚（順產），要有人扑暈我先得。」
至於曾江分享與薛家燕相處軼事：「佢啱啱入行仲讀緊書，要帶功課去片場，佢埋位我咪幫佢做囉。」至於謝賢早前澄清二人不和，他說：「係呀，做戲啫。（呃晒全港巿民。）當然，我哋係演員嘛。（成日約佢飲茶？）係，我哋一輩仲有幾多個可以坐埋話當年！」胡楓則搞笑讚薛家燕：「佢Figure性感，做人都感性！」引得全場爆笑。
