咀朱朱「報細數」譚俊彥激嬲老婆

藝人譚俊彥與關楚耀等昨日出席劇集《特技人》宣傳活動。譚俊彥被問到近日播出朱晨麗發春夢與他激咀的戲份，對方身穿運動Bra Top谷盡34D上陣，他笑言受這場戲連累而要返屋企「跪玻璃」向老婆請罪：「咁啱喺煞科宴播呢場戲，我老婆話貨不對辦嘅，唔係我所講咁！我只係話有少少接觸，佢冇諗過係咁嘅接觸，少少嬲囉！」又指拍攝咀戲時並不緊張，因拍過不少親熱戲，反而朱晨麗有點害怕：「個廠冷氣又好凍，停機嗰陣都搵件褸摟住佢，但對眼都唔知放喺邊。」又指拍親熱戲特別小心，免得被指是鹹豬手。