郭子豪變爆肌巨人冇晒欲望
無綫大隻男郭子豪早前在劇集《三個女人一個因》大晒結實肌肉，令不少Fans流晒口水，近月他「變本加厲」狂操肌變身「變型俠醫」，於本周六參加健美比賽，隨着比賽日漸近，其體重達200磅，脂肪比例只剩下3%，身上肌肉淨重達110磅，18吋麒麟臂加48吋雞排胸，朱古力腹肌超明顯，相信比賽當日會更爆肌！
感覺似喪屍
子豪直言過去八個月經歷不同階段的操練期，多次想過放棄，但每次都咬緊牙關捱過：「最開頭兩星期因為身體未適應，過勞搞到完全瞓唔到，後來體重多咗60磅，脊椎同膝頭都覺得痛，到近排要做大量帶氧運動好辛苦。」最後階段來到最慘烈的收身節食期，要戒碳水化合物，他直言感覺似喪屍欠精神：「咩都冇Feel，每日只係做Gym，食嘢又冇味，真係咩欲望都冇晒！」
受傷似「讓半臂」
他坦言最大打擊是上月在家發生電磁爐爆破意外，他被玻璃碎割傷手需縫20針，令健身計劃受阻，自爆要瞞着醫生帶指套操練，傷口隨時再爆：「右手手指尾都縫八針，埋口又埋得唔好，醫生叫我抖到年底，冇可能啦！我堅持要比賽，好多人撐我，我背負好大責任，依家得番一半健身動作做到，亦要減重量，喺呢個咁關鍵嘅時候整傷，好似讓咗半臂咁！」
場地：Goji Studios