何雁詩餓足一年「回歸」樂壇
歌手何雁詩最近忙於拍攝無綫劇《牛下女高音》，但同時不忘歌唱事業，她透露已着手籌備新歌：「已經一年冇出歌，好期待有製成品。之前去咗紐約登台，第一次去當地做騷，我興奮咗成個星期！雖然前後只係去5日，但好感激劇組度期畀我。」
以往多演喜劇的她，早前首度拍攝嚴肅古裝劇《天命》，並飾演賢妻良母，與現實有頗大分別。問到唸對白方面會否有難度？她坦言：「雖然文縐縐，但有好多前輩喺身邊，跟住佢哋做，感覺都可以。（有冇難忘場口？）有場戲我要爆喊，仲要着住丁字鞋喺走廊狂奔，拍咗幾個鐘，真係好攰！」
