鄭嘉穎講「我太太」陳凱琳打冷震

藝人鄭嘉穎和陳凱琳（Grace）昨日以一黑一白打扮出席活動，由於現場落大雨，嘉穎負責擔遮，Grace則變樹熊攬實老公，但仍然濕身，他即Man爆叫助手幫老婆抹身。婚後首次夫妻檔出活動，嘉穎笑言貴精不貴多，問到是否滿意酬勞？Grace說：「OK。（酬勞係咪當家用畀晒你？）家用一齊用。」

互笠高帽 謙虛啲好

結婚時，嘉穎承諾將錢畀晒老婆使，他即笑指記者多事：「我畀佢當家，但佢唔係好明乜嘢係當家，其實意思係我負責出錢，我太太好知慳識儉嘅。」但講完二人齊齊打冷震，場面搞笑。他又讚老婆精打細算，放心由她當家。Grace亦回敬畀老公超過100分，他聞言即說：「謙虛啲好。」提到造人大計，嘉穎認為BB是上天賜的禮物，仔女都鍾意，對於胡杏兒指他喜歡生女，他說：「如果我第日生仔，佢睇到會唔開心，要公平啲，不過都想BB似媽咪。」Grace即甜笑指BB似嘉穎都好。

阿Sa面紅 大嗌老土

同場還有歌手蔡卓妍（阿Sa）和藝人惠英紅，早前滑水樂極生悲致額頭留疤的阿Sa，要靠化妝遮掩傷痕。她指整容醫生的縫針手勢不錯，問到男友有否呵番？她說：「男友好緊張，整容醫生其實係佢搵。」記者笑問有否整埋其他部位？她即反白眼說：「第日要開工。（唔使開工就會整？）會考慮嘅。」

嘉穎與陳凱琳一齊打冷震，以笑遮醜。	阿Sa承認早前與男友到蘇梅島旅行。	惠英紅自爆背舞台劇劇本很大壓力。

再問男友是否承諾無論她變成點都會喜歡？她即面紅說：「你哋唔好咁老土啦！」並指對方沒有禁止她再滑水，不過她笑言靠樣搵食，以後會戴頭盔保護。提到她早前與男友出埠旅行，她默認去了蘇梅島玩樂。

惠英紅透露快將拍畢無綫劇《鐵探》，之後忙於綵排年底的舞台劇《玻璃動物園》，她坦言壓力大到「爆血管」：「劇本成吋厚，一有時間就背劇本，好緊張，自己大壓力到眼同四肢都爆微絲血管。」提到任容祖兒助手的胞妹Sandy退休，她說：「佢自有主意，最緊要開心。」