陳奕迅踎茶記忍口怕翻脹
向來圓碌碌的陳奕迅（Eason）下定決心減肥，經過兩個多月的努力後，明顯瘦了一圈，減走肚腩！為了保持身形，日前他與朋友在大坑茶餐廳醫肚時，全晚忍口齋飲唔食，只發揮「吹神」本色講不停！
Eason出道至今，體重與歌酬都有增無減，向來肥嘟嘟的他體重曾突破170磅。熱愛運動的徐濠縈為免老公因肥胖影響健康，曾多番勸他減肥，奈何Eason欠恒心，減極唔瘦，身形更愈來愈脹！最近他終於被老婆勸服，今年5月開始接受地獄式訓練，跟隨張家輝的健身教練操練，每次操一個至個半小時，努力兩個多月後似乎稍有成績！
「吹神」發功講不停
日前晚上8時許，Eason與一名男友人現身大坑一間茶餐廳，兩人坐在室外位置邊飲邊傾，穿白Tee襯長褲的Eason明顯瘦了不少，未有凸出肚腩，當晚見他全程齋飲唔食。
期間有途人經過見到記者拍攝，即向Eason「通水」，心情大靚的他向記者笑笑口打招呼，然後繼續與友人吹水。臨走前，他被食店職員「集郵」亦來者不拒，相當友善！