湯怡做業主陳家樂（抓）「同居」
英皇藝人陳家樂及湯怡昨午出席公開活動，湯怡最近榮升業主，令家樂很「葡萄」，想以優惠價租對方一間房，湯怡卻即派檸檬：「你真係要慳啲啦！」
陳家樂與湯怡到馬鞍山為英皇珠寶分店剪綵，家住馬鞍山的家樂一直想置業，但只聞樓梯聲，他說：「追唔切樓價升幅呀！我想買番馬鞍山區，但實在太貴，可能出年先做到業主。我邊有湯怡咁慳，我有養車，佢就搭公共交通工具，佢依家已經係業主。」他更自爆曾搬開自住，但發覺支出太大，最終亦「回歸」屋企。
湯怡承認月前於將軍澳區購入兩房單位，近日完成裝修並已入伙：「呢個係我30歲前嘅願望。（同男友洪卓立一齊買？）我自己名，男主人係我隻狗。」家樂聞言即笑說：「兩間房租間畀我啦！我嚟緊拍無綫劇要拍到12月底，5,000蚊1個月吖？」湯怡笑答：「5,000蚊？一星期租呀？係就即刻應承你，唔係嘅話你真係要慳啲啦！」
要父母「禁足」
另外，家樂透露昨日獲幾位伯母到場支持：「佢哋嘅囝囝同我由細玩到大，佢哋想嚟買嘢，睇吓我幫唔幫到手攞折。（直情送畀佢哋啦！）送唔起，津貼啦！其實我最驚父母現身，對我嚟講工作會有壓力，所以唔准佢哋出街，直至我工作完返到屋企。」
