餓足成個月陳豪焦急接機飛撲咀茵媺
藝人陳豪（阿Mo）前晚現身機場迎接太太陳茵媺（Aimee）及三名寶貝仔女回港，分隔約一個月，阿Mo超掛住屋企人，甫見Aimee出閘即飛奔上前送「肉嘴」，再逐一錫錫仔女，場面超溫馨！
Aimee早前帶住三個寶貝仔女返加拿大娘家，留低陳豪一支公在港搵錢及準備無綫新劇《殺手》。離開老公四個星期，Aimee前晚帶三名仔女回港，阿Mo約於8時10分現身機場，因飛機延誤大半小時，他在接機區等候40分鐘，期間不時焦急地睇時間，但面對劇迷「集郵」都無任歡迎。
聞造人：你曳曳
阿Mo等候時受訪，自封「湊仔公」的他笑言這段時間感覺無聊，除了準備新劇，都會跟仔女視像齊齊食早餐。他又指太太一拖三冇助手，因此一定要接機。問到見到四個寶貝錫邊個先？阿Mo笑言：「梗係錫老婆先！（趁暑假陪多啲仔女？）等佢哋應付埋時差，休息、做吓功課要開學喇！都有計劃家庭旅行，但要睇大仔個時間表，同埋唔可以係長途。」他笑言有機會是聖誕假期，之前會先安排兩公婆二人世界，會否趁機造人？他以招牌笑聲回應：「你曳曳呀！（再熱鬧啲？）我屋企已經好熱鬧！」
當見到老婆推住BB車步出，阿Mo即箭步上前同老婆咀嘴，再逐一親親子女，非常有愛。一家五口合照時，4歲大仔怕醜走到爹哋身後，3歲二仔即離開BB車搵哥哥，反而兩歲細女最淡定。
仔女掛住爹哋
問到此行是否很辛苦？Aimee笑言：「有啲攰呀！機上面有少少扭計。（阿Mo話好空虛！）佢掛住我哋，我哋都好掛住佢呀！（玩到唔記得爹哋？）當地有公公婆婆同啲長輩，又多戶外活動，但佢哋都有話Miss Daddy。」