陳凱琳4次多謝嘉穎帶畀我永遠幸福

快將49歲的鄭嘉穎與27歲前港姐冠軍陳凱琳（Grace）昨日在峇里完成人生大事，早上Grace戴上4.18卡鑽戒進行斟茶儀式，行禮則穿上低胸吊帶白色婚紗，束腰設計未覺有孕味。一對新人各自準備誓詞，新郎透露媽媽常問他甚麼時候結婚：「我同佢講可能生完BB先結婚，Sorry媽咪，嚇咗你咁耐！」對Grace講誓詞時更加冧爆：「你帶畀我嘅喜悅、快樂，係從來未試過，你令我想組織家庭，同你拍拖一年左右就向你求婚，但時機未成熟要等到今年，多謝你答應嫁畀我，無論以後條路係點，我哋一齊行落去，我會照顧你一生一世，I Love You So Much！」

拍拖第一日已好溫馨

而Grace就4度多謝嘉穎，緊張得邊講邊喊：「我好記得第一次同你見面，你第一句說話係：『你要多謝我，因為係我鼓勵咗個監製喺套劇用你。』」嘉穎則笑指：「我鼓勵咗好多監製。」令全場笑聲不斷。Grace續說：「當初我覺得呢個男仔好古怪，第一次見面就講咁嘅說話，估唔到我哋拍拖後，嗰句多謝係反映咗咁多意思。我多謝你，我係一個好冇自信嘅人，喺我失望、對自己好冇自信嘅時候，你一定鼓勵我要堅強、要釋懷，難過嘅時刻會過去，要諗住將來嘅開心，每一次你都係啱。多謝你，教識我做人，我同你喺埋一齊就變成我哋，我哋組織家庭之後就變成佢哋，我好期待同你組織家庭。多謝你，同你一齊好幸福，同你拍拖第一日就已經好溫馨、好有愛，雖然有啲人話過多幾年就會冇，但同你一齊嘅時候就有呢種感覺。多謝你，帶畀我永遠嘅幸福。I Love You。」

陳凱琳冧爆攬實嘉穎咀嘴！	陳凱琳戴上4.18卡鑽戒及金器，最重要有嘉穎錫到燶。	嘉穎與陳凱琳講誓詞時感動落淚。

嫁女的陳媽媽與娶新抱的鄭媽媽，見到二人成家立室，齊齊感動流淚，而陳爸爸雖感不捨，仍強忍淚水，全程表現得相當興奮！

心跳加速 攬實啜爆

嘉穎接受電話訪問時，坦言婚禮令他很感動，見到Grace步入教堂一刻已忍不住流淚，又覺得婚禮與別不同，除誓詞外，雙方都講出對對方的感覺：「呢段係我哋兩個都好感動，多謝大家嘅祝福，多謝晒！」

Grace則透露行禮前叫嘉穎先去教堂，因不想他看到其婚紗Look，當自己着起婚紗就心跳加速，個肚囉囉攣，要深呼吸及翹實爸爸：「入教堂一刻，我見到全部人企起身歡迎我哋，行到最尾時忍住唔喊，但我望住嘉穎，佢已經流眼淚，估唔到佢比我早喊，我都忍唔住喊！」她直言感覺超現實，好開心有好老公，期待將來幸福快樂。二人亦感謝親友遠道而來觀禮。一對新人禮成後步出教堂，接受親友祝福及拋花球，由Grace的圈外朋友接到，新娘更在教堂前肉緊攬實老公咀嘴，Sweet爆！