歐倩怡閉關讀書老公怕怕
育有一對仔女的藝人歐倩怡昨日在電台節目分享育兒心得，正攻讀營養學學士學位的她透露剛從布吉旅遊返港︰「呢個係第二個學位，之前讀市場管理、商科，安仔（老公郭晉安）都怕咗我呀，知道我又唔見人！（小朋友受你感染，都鍾意讀書？）希望可以感染到佢哋，細女喺學期尾拎咗個學術獎，平時見佢喺屋企冇點讀，都好Surprise！」
提到兩個小朋友均已升讀小學，她笑言終於「甩身」，又指全家都愛書，包括老公︰「佢會同我講佢疊劇本幾厚呀，早排佢拍《白色強人》都有好多醫學嘢，有一齊研究。（你會重出江湖拍戲？）依家目標係做營養師，自己16歲入行，人生除咗娛樂圈之外都好豐富，有好多嘢可以做，但如果有機會而時間又啱，都會試。」