岑日珈躁鬱症9年抗戰回勇攻日
與盧凱彤同樣患有躁鬱症的藝人岑日珈，經過長達9年的治療，病情曾經陷入嚴重邊緣，持續失眠兼暴食，導致全身腫脹被誤以為有喜，如今搣甩25磅肥肉，病情好轉，更將出戰日本，化身Tokyo Girl去行騷圓夢。
年前因為躁鬱症暴肥近30磅的岑日珈（Angie），停工接近一年，日前黃昏見她着上小背心熱褲在海濱公園跑步，又壓腿又扭腰，身形明顯消瘦了。據知她用了三個月時間減掉25磅，病情亦受控制，故發奮追回寶貴光陰，正重新出發的她月底將踏上日本天橋為TGC（Tokyo Girls Collection）行騷。
15歲開始患焦慮及強迫症的她，經學校社工轉介到政府醫院睇精神科，昨日她受訪說：「嗰時返學行到半路，我會跑返屋企睇吓閂咗水喉未，所以嗰時成日遲到，好影響學業，就算喺屋企每晚都會重複檢查啲窗閂好未，嗰時屋企幾百呎，一眼睇晒，但我最嚴重可以重複做廿幾次。」由那時開始，她便需要服藥治療。
失眠喪食暴肥
初時病情只屬輕微的她，於2016年惡化至嚴重程度，當時她覺得好迷失，長期失眠：「抑鬱症測試後，醫生話我係躁鬱症，成日鑽牛角尖，完全『放啤』自己，人到咗極限，想瞓但瞓唔到，個人好攰，個腦不停轉，係好辛苦，嗰時試過醫生畀我嘅一排藥，我一次過食晒，我冇諗過傷害自己，仲會喪食好似開大食會咁，但其實我係斷片唔知，嗰段時間我會匿埋屋企，唔想換衫、三、四日唔洗頭，總之好懶。」
「生咗個仔！」
其體重最「頂磅」時達135磅，曾多次被誤以為「大肚」，她說：「嗰時我成日去食海鮮，瘦番後有次個夥計問我：『你生咗啦？』我同媽咪笑到暈，仲呃佢話：『係呀，生咗個仔！』每次我去買護膚品，啲售貨員就話唔係咁適合大肚婆，嗰刻我突然間醒咗，點解咁簡單自己嘅身形都做唔好，可能個天安排我反省，覺得自己浪費咗一年時間，我開始積極做運動同食菜、雞胸肉，之前醫生話我好咗好多，其實除咗睇醫生同食藥，情緒病好靠個人意志。」
對於有機會到日本行騷，她坦言好開心能圓夢，知道繼Angelababy及周秀娜後，已經有7年沒有香港藝人做代表行騷，她說：「我依家110磅，但希望再減多10磅，我知日本揀人都幾嚴格，早喺半年前已經搞，第一關過咗唔代表就得，等嘅時候都好緊張，喺中學時好崇拜日本潮流，有機會行TGC覺得好有成功感。」身高1米70的她自稱42吋長腿是今次獲勝優點。