陳豪顧家買車戒辣

陳豪與湯鎮業孖仔湯君慈和湯君耀一同出席活動，靚人靚車。

現已升呢型爸的陳豪，由揸開篷跑車變揸7人家庭車，問到家有3個小朋友，BB車比家用車更多？他笑說：「都係呀，唔只BB車，遲啲小朋友會買埋單車。」又稱現時買車以實用及安全為先。

問到是否不再揸辣跑？他說：「做咗老竇嘛，要顧及安全。（即係冇溝女戰車同老婆遊車河？）咁唔同拍拖嗰時，以前我揸開篷車，依家係有家室嘅人，一家之主，要照顧所有，唔能夠咁自私。（為老婆同小朋友犧牲？）唔係犧牲，我好Enjoy咁嘅生活，佢哋唔喺度囉囉攣，瞓又瞓唔到咁多，睇電視都睇唔到咁多，加上時差通電話時間都唔啱。」至於是否獨守空房？他哈哈大笑，並稱現時剛好開劇，用來做準備。

講起老婆仔女，陳豪笑得特別Sweet！

湛琪清

湯鎮業孖仔揀女各有口味

至於孖仔君慈和君耀在美國讀書時都有揸車，現時只得弟弟有香港車牌，問到可會接送女朋友？君耀稱在港只有揸車接送父母，尷尬說已沒有拍拖一段時間。問到兩兄弟可會鍾意同類型女仔？君慈說都不一樣，他喜歡乖和有性格愛靜的女仔。君耀則稱相處要有Feel。至於會否考慮和孖女拍拖？兩人笑言好多人都有問這問題，但暫時未試過。