胡定欣暗撻張振朗？「佢係好男仔！」

胡定欣與張振朗合作後傳擦出火花，發展相差6歲的姊弟戀。

下月9日踏入37歲的胡定欣，自2016年與音樂人陳明道分手後，曾與劇集拍檔陳展鵬傳過緋聞，可惜只屬「冇米粥」。Dry足兩年的她日前自爆有追求者，又指完成手上工作後便有時間與對方深入了解，但有讀者爆料指她早已有着落，與年輕六年的31歲張振朗發展姊弟戀！

北上開工 日對夜對

有指兩人早前合作新劇《包青天再起風雲》，北上拍攝兩個多月，剛巧張振朗與陳芷尤甩拖，回復單身後日對夜對下，結果擦出愛火。劇集殺青後，兩人仍頻頻見面，曾不避嫌分享約會合照，上月更齊齊欣賞「豹哥」單立文的演唱會，男方亦被發現到場支持胡定欣的舞台劇！本月20日生日的他曾晒出「展昭」造型蛋糕，負責製作的蛋糕師正是女方的好友，相信是她專誠訂製蛋糕送驚喜。

兩人單獨約會，並將合照擺上網「放閃」。	兩人被指拍拖睇單立文開騷。	胡定欣（右）

• 張振朗早前收到「展昭」蛋糕，有指由定欣找好友製作。

呻冇時間同新歡了解

記者聯絡胡定欣及張振朗，兩人齊聲否認戀情，胡定欣說：「吓！咁搞笑咁有趣，佢係好男仔嚟嘅。（張振朗追過你？）冇呀，真係冇！（拖正印男友出嚟澄清？）有時間同人了解先得，之後要同馬浚偉去加拿大登台。」張振朗亦說：「我覺得好好笑，個蛋糕係屋企人送，同埋我係同謝東閔一齊睇豹哥個騷。（接受姊弟戀？）我以事業為重。」