韓國人氣綜藝節目《Running Man》（RM）近日趁幾位荷里活演員到當地谷戲，力邀他們作客玩遊戲，但劉在石依然冇放水，與嘉賓瞓身爭奪外賣箱。
日前第9度訪韓的荷里活巨星湯告魯斯（Tom Cruise），偕英國男星亨利卡維爾（Henry Cavill）與西蒙柏奇（Simon Pegg）在當地宣傳新片《職業特工隊：叛逆之謎》（簡稱《職工6》），期間抽空錄影韓國「國民MC」劉在石有份主持的《RM》，並將於明午播出。
昨日率先公開預告片造勢，由於今次是《RM》首度有三位荷里活巨星同時亮相，光洙見到重量級嘉賓時也相當驚喜，智孝更激動到笑不攏嘴！靚佬湯則露出招牌笑容，興奮地十指緊握劉在石，又熱情地與光洙握手。
三位「特工」入鄉隨俗學派心心，之後輪流與劉在石展開對決，與亨利爭奪外賣箱時冇面畀，兩人更玩到倒地。除了玩「間諜戰」及參與「神秘任務」外，嘉賓們背部還貼上韓文名牌，似預告將會跟成員們玩「撕名牌」遊戲，令觀眾勁期待。