荷里活動作男星布斯韋利士（Bruce Willis），在向他致敬的「寸」燒大會中被寸到一戙都冇，前妻狄美摩亞（Demi Moore）更驚喜現身，嘲諷他主演的《虎膽龍威》（Die Hard）愈拍愈爛，更大踩他的光頭！
華人圈子擦鞋上位歌功頌德是常態，不過西洋人比較有幽默感，致敬大會反而將主角擺上枱接受眾人嘲諷！搞笑頻道Comedy Central一年一度的「寸」燒大會（Roast）上周末舉行，今次目標是布斯，配合其經典作品《虎膽龍威》上映30周年紀念，曾與他合作的圈中好友現身盡情寸他一番，前妻狄美更是神秘嘉賓，布斯亦大方上台「受刑」！
狄美以兩人失敗的婚姻開玩笑：「我哋嘅婚姻由《虎膽龍威》第一集維持到第三集，咁都合理，因為最尾兩集好爛！大家都問我哋點解離婚，我諗係因為開始妒忌……佢接受唔到我光頭（《伴我雄心》（G.I. Jane）造型）比佢更好睇。」又指布斯不應視兩人的婚姻為最大失敗，皆因他以往生意失敗、接錯片、推錯片等仲大鑊！事後布斯受訪，笑言自己的脫髮問題無藥可救：「我個頭就係我個頭，冇得搞，就係咁。」
約瑟哥頓利維（Joseph Gordon-Levitt）將狄美另一前夫艾斯頓古查（Ashton Kutcher）擺上枱：「布斯，我哋今晚會好開心，但唔好太自在，因為等陣我哋會用艾斯頓古查嚟取代你。」
至於前NBA球星洛文（Dennis Rodman）聯同扮北韓領袖金正恩的節目監製Jeff Ross到場。
身為金正恩老友的洛文大講親北韓笑話：「布斯成日同阿金一樣拍炸彈戲，但至少阿金醒少少唔會真係放出嚟。」結果被大噓。