思琦出水芙蓉損手 楊嘉文吹峰冷病

楊思琦將踩場到書展造勢，記得捧場！

今年書展寫真戰空前激烈，由o靚模到人母、A Cup到H Cup應有盡有，各人想盡辦法突出重圍。下月將滿40歲的人母楊思琦今年有份參戰，以多套性感裝扮大晒Fit爆Body，搏盡擺甫士搞到整親！

思琦早前到馬來西亞拍攝，身穿黃色Sharp醒泳衣玩濕身誘惑，落水大晒34D「胸」器。為求效果完美，雖然由朝曬到晚，但她仍保持專業，多次出水芙蓉玩揈水髮，更應攝影師要求，不停按着碎石泳池邊重覆上水動作，搞到手掌擦損！她透露將於明日下午4時到會展舉行見面會，並於下月3日舉行生日粉絲見面會，與Fans近距離接觸及簽名。

行沙灘致爛腳

另一位推出寫真的21歲o靚模楊嘉文（Kana）擁有32H勁爆身材，並到茶餐廳、公園及屋邨拍攝，勾起讀者的學生時代回憶，當然亦有泳衣Look。由於身材冚都冚唔住，她大部分室內景都是真空上陣，結果搞到冷病：「想效果自然啲，所以好多相都係冇打底，但跟住又要吹風同埋濕身，結果冷親發燒，仲病咗幾日！」提到赤腳行沙灘晒身材，相當唯美，她坦言有苦自知：「其實現場係好多垃圾，拍完一日對腳皮膚敏感，依家仲一撻撻！」

楊思琦	呢個「出水芙蓉」嘅動作，搞到雙手擦損咗。	楊嘉文浸完水又返室內「真空」吹冷氣，結果冷親。