張繼聰教囝囝追女國際化
藝人張繼總與囝囝張瞻情同兄弟，兩父子全無隔膜，阿聰更傳授「追女心得」，鼓勵囝囝婚前多結交異性朋友，甚至「交友國際化」，即使他朝帶外籍女友返家亦相當歡迎！
阿聰與麥明詩昨午到銅鑼灣出席卡通人物活動，談到暑假，阿聰說：「我忙緊拍戲，好彩囝囝又足球比賽、又同啲同學有節目，反而我想爭取時間見多啲個女。佢早瞓，如果我放工返到去佢瞓咗，我會好失落，妄想佢會起身。依家好有初戀嘅感覺，我同囡囡感情好深厚！」
婚前玩多啲
他直言與囝囝似兄弟多過似父子，二人相約睇戲及打拳「交流」，更大談「追女心得」﹗阿聰笑說：「我叫佢玩多啲，結婚前可以識多啲朋友，結婚後就要專一喇！有時我去接放學見到啲外籍女同學，覺得都幾靚，叫個仔去識吓人，國際化啲，做啲我做唔到嘅嘢，無奈佢比較鍾意中國同學。」
麥明詩唔閃婚
麥明詩聞言即插口：「我媽咪都好早灌輸呢方面嘅嘢畀我，教我揀男仔要敦厚，同埋唔好為男仔放棄一切！」談到日前接獲表姐花球，她笑說：「夾咗叫佢畀我嘅，咁係女仔都恨嫁啦！表姐大我兩歲，有啲壓力，不過我想三十幾先完成人生大事，同埋一定唔會閃婚，我想玩多啲先。」她自言拍過3次拖，會積極物色下一個。另外，阿聰上載「晒肌相」並留言：「由於中咗核輻射，個身不停變大要不停買衫。」