方中信食「暗黑料理」打定底犯險
蕭正楠為節目出盡力，請來少有上綜藝節目的方中信挑戰「暗黑料理」，方中信笑言睇過幾集，知道情況有幾恐怖，所以事先「打定底」，希望唔會食到勁嘔！
藝人方中信、唐文龍和李璨琛應好友蕭正楠（Edwin）的邀請，前晚現身將軍澳電視城為其主持的節目《美女廚房》擔任嘉賓。方中信少有亮相綜藝節目，他指到現場驚見保安手執滅火筒、錄影廠設有急救箱，才發現有機會遇上「危險」，並笑說：「我事先食咗雙餸飯同例湯打底，但應該唔會嘔得勁。（有睇節目？）睇過之前幾集，都好恐怖！不過蕭正楠話都會有人識煮，但機會都幾微。」自言識煮幾味的他，或會現場過兩招給女嘉賓以脫離危險。他又透露將坐夜機飛赴意大利，會合妻女旅行放假：「每年都會同個女放暑假，8月再開工。（有咩行程？）都係老婆安排，我只負責上機同埋畀錢！」
蕭正楠當翠如「終極武器」
Edwin透露早於節目播出前邀請三位好友：「之前好耐冇見，齊齊打邊爐，方中信好關心我個節目，我咪話啲嘢好食(口架)，一次請晒佢哋三個上嚟，當時個節目未播，佢哋未知好唔好食。」問到何時請黃翠如上節目？他大膽取笑女友說：「佢係我終極武器嚟，等我請到啲最憎嘅男嘉賓，我再叫翠如上嚟煮畀佢食！」
對於成功氹得好友「入局」，Edwin笑說：「佢哋真係好畀面。（啲嘢食太生會幫手頂？）我會買條廁紙畀佢。（方中信話要坐飛機！）飛機上總有廁所！」他表示再次「出賣」兄弟：「我出盡力請我啲兄弟，今日見到黎耀祥拍完內地劇返嚟，佢扭計話要人陪，咁曹永廉都掛住啲美女學徒喎，再上嚟整多集For公公嘅！」
