曾文豪海陸空冧妻李美慧回贈愛的廿蚊

31歲前港姐李美慧（Vivi）與57歲曾文豪六月初於香港設婚宴，前晚法國時間六時許，二人與親友於曾文豪新購的50萬呎莊園舉行結婚派對，由於當日是男方與其母的生日，故四代同堂慶祝，喜事重重。

仲有個森林

前晚，他們於莊園戶外舉行派對，偌大草園及周圍布滿鮮花，令人心曠神怡。Vivi換上多套服飾，包括花花裙及綠色低胸裙，懷胎六個月的她明顯見肚，心情High爆，與老公多次咀嘴之餘，更滿場飛自拍短片，一時介紹莊園，一時又扮DJ打碟。Vivi除了送結婚紀念冊給老公外，還有一張二十元紙幣，編號正是對方的生日日期，非常有心思。據知，Vivi亦送了玻璃製的花及千年人參給奶奶，盡顯孝心。

二人之前於當地度蜜月，曾文豪親自駕駛直升機接載老婆，於法國擁有豪華遊艇的他，亦不時載愛妻出海，可謂非一般享受。Vivi昨晚接受訪問時表示：「尋晚個Party好開心。（依家個肚咁大，唔攰咩？）唔攰，一啲都唔辛苦，啲人話會腰痛，但係我冇，可能我做好多運動。」問到是否在家中的泳池游水？她說：「唔係，我係出海游，老公好熟呢度，佢帶我周圍去玩，我哋有遊艇，我喺海度游水，但係有着救生衣嘅。」提到四代同堂齊齊出席派對，她開心說：「係呀，好多小朋友，老公三個孫都喺度，佢講嘢時仲扯佢個咪，好搞笑！我哋仲有個森林。（裏面有啲乜嘢？）暫時未有嘢，不過之後會喺森林起樹屋畀小朋友玩。」她坦言與曾文豪的女兒們相處得很開心，除了幫她揀衫，又為她化妝：「其實我同老公好多嘢都好夾，因為好多嘢都一樣，我哋六年前居然不約而同買埋同一款嘅袋，就連電話叉電線都一樣，而我哋個莊園其中一條街嘅名，都係叫Vivi。（佢因為咁專登買嗰度？）唔係呀，係撞啱，真係好有緣。」

曾文豪與李美慧在池邊起舞，心情High爆。	曾文豪7月4日生日，老婆特別送上編號「704」的廿元紙幣。	曾文豪出動直升機氹老婆。

月中返港拍劇

雖然現時可享少奶奶生活，但Vivi仍熱愛工作，透露本月15日會返港拍攝無綫劇《鐵探》，飾演黑社會阿嫂。問到老公擔不擔心她腹大便便工作？她說：「唔怕，都係一啲文戲，已經同導演、監製溝通好，到時着啲鬆身衫遮住個肚。」

莊園面積偌大，眾人盡情吃喝玩樂。

曾文豪說話時被孫兒扯咪，場面搞笑。