葉翠翠湊兩個攞命 封肚唔追女

36歲的葉翠翠上月30日剖腹誕下囝囝，昨日老公周曉東帶同1歲多的大仔Jake接她出院。身穿露肩裙及4吋高跟鞋的翠翠精神奕奕現身，獲老公輕吻面頰，場面溫馨。期間，她突然以紙巾抹眼，但解釋並非感動到喊，只是有東西吹入眼。

社會危險 生女擔驚受怕

翠翠稱細仔足月出世，但想不到重達9磅，又指今次分娩比第一胎舒服得多：「冇咁驚！上次都係開刀生，雖然局部麻醉但都好痛，痛到全程喊。今次我同醫生反映咗，佢畀啲氣我聞，成個過程冇痛。」問到已有兩名小王子，會否有意追女，她即時耍手擰頭：「兩個已經攞命！今次佗得好攰，又要照顧大仔，但又抱唔到佢，個心都好唔舒服，兩個都夠。其實我係鍾意女，但依家社會好危險，生女好多嘢要擔心，所以唔追。」又坦言老公想要女，但她堅持封肚，意外都要避免：「如果再生都唔係女咁點？再生仔真係連屋都拆埋啊！」

細仔大食 唔夠母乳

至於細仔的名字，翠翠表示仍未決定：「我老公都諗咗英文名幾個月，尋晚話不如叫Titus，但我上網睇過原來係牌子名，所以打消咗個念頭，我諗佢要花多幾個月去諗！中英文名都係老公改，我諗乜都冇用，佢唔會批准，應該會夾吓八字。」她透露會餵人奶，但BB大食：「補奶粉都要三安士！我諗我要努力，但唔畀太大壓力自己。」

翠翠指兩個夠晒數，不打算追番個女。	翠翠獲老公送吻，甜到入心！	放大圖片

穿高踭鞋出院的她自認貪靚：「今次佗B好緊張，因為經常喺Facebook教人長胎同點樣保持狀態，我要做個人辦畀佢哋睇，生完唔可以好憔悴，要畀人知保健同保養都好重要。」