李泳漢學煮住家菜日做15粒鐘

學廚非常困身，令他更珍惜與家人相聚的時間。

原本已有一名2歲囝囝Alfie的李泳漢，透露知道今胎是女後，令一直恨抱孫女的李家鼎喜出望外，更坦言會錫到燶！而他亦因囡囡作了一個重大決定，就是去朋友餐廳幫手：「因為我太太唔識煮飯，佢鍾意做女強人，而我就最難忘以前全家人圍埋一齊食飯，呢種凝聚力好緊要，本身我識整西餐，中菜就唔在行，係個女令我的起心肝。」

太太詐型被冷落

由於每日要早出夜歸，李泳漢坦言少了陪太太與囝囝，故早前Alfie生日立即請假，與母親施明、弟弟泳豪一起食自助餐慶祝。問他為何不直接向父親偷師，他沒好氣說：「鼎爺（李家鼎）要求好嚴格，佢叫我唔好整衰佢個名，叫我由基本功學起，睇吓夠唔夠恒心，我初時都怕自己捱唔住，做做吓又OK喎！」他大爆太太詐型被冷落，現在惟有早點起床，同家人食完早餐才上班，爭取多點相處時間。

唔好整衰我個名！ 李家鼎廚藝了得，相信兒子亦有遺傳。	李泳漢自言是慈父，對住囝囝惡唔起。	李泳漢約埋母親施明和泳豪食自助餐慶祝Alfie兩歲生日。