譚詠麟8強中6隊：啲燈留畀人哋做啦！

譚詠麟認真犀利，爆冷賽果都貼中。

不少圈中人現時晚晚捱夜睇波，其中帶領明星足球隊的譚詠麟（阿倫）更是表表者，昨日他與歌神許冠傑（Sam）合體，為8月的《阿SAM & 阿TAM HAPPY TOGETHER PART II金曲速遞演唱會》進行綵排，他笑言睇波影響綵排進度，但依然睇波行先，因為四年一度很難得。日前到俄羅斯觀賞賽事的他表示，過幾日會再飛當地睇季軍賽及決賽。

叫梁漢文捽碌柚葉

眼光獨到的阿倫更透露貼中晉級球隊：「希望英格蘭同瑞士都入埋（截稿前未有賽果），咁我就8強全中。（你唔係明燈？）啲燈留畀人哋做啦。（今屆好多爆冷？）係呀，日本虛驚一場，踢得好呀，為亞洲球隊爭光，雖敗猶榮。」提到梁漢文睇波時撼爆額頭，他抵死笑言：「叫咗佢o架啦，呢幾日踢波都見佢腳軟軟咁，我話佢係咪唔夠瞓呀，佢仲話得，一係叫佢搵啲碌柚葉捽吓身。」講到演唱會，兩人預告今次只得幾首歌跟上次一樣，亦會舉行巡唱，阿倫笑言一年半載要與Sam的家人結為一體。

許冠傑密密為演唱會進行綵排。

郭富城力撐巴西捧盃。

陳伶俐現場撐愛隊

而身為瑞士著名鐘錶製造商LONGINES優雅形象大使的郭富城，日前到天津為新店揭幕，他表示有看德國對南韓的賽事：「足球競技場就好似電影劇本，成日有出人意表嘅結果，亦好似演技同演唱會都唔可以千篇一律。」他直言睇好巴西，因為隊員既靈活又多變化，更指曾有朋友邀他結伴到俄羅斯睇決賽，但可惜因工作未能成行。他又透露完成電影拍攝後，將於11月以廣州為首站，展開100場世界巡迴演唱會。此外，力撐巴西的劉嘉玲得知愛隊勝出後，在網上甫片祝賀，更開心到飲紅酒慶祝，而陳伶俐亦飛抵俄羅斯睇波撐愛隊。