藝人姚子羚最近孖好姊妹李施嬅及胡蓓蔚（豹嫂）到菲律賓旅行，出發前透露收到豹嫂送贈的性感泳裝，預告可能在旅程中大解放，話口未完就極速「找數」！雖然三人同樣泳裝上陣，但以姚子羚的超Deep V一件頭最有睇頭，前面中門大開，背面則是大露背，相當養眼！她在瀑布前瞇眼留影，獲讚性感又誘人！至於身穿紅色泳裝的豹嫂亦不遑多讓，大騷蛇腰，同樣弗爆！
身在日本的無綫小花林穎彤（Bella）亦晒水着照派福利，穿上紅色綁帶泳衣，谷出三吋事業線，坐在池邊露白滑美腿，又對鏡頭嘟嘴放電，令粉絲暈得一陣陣，留言激讚她禾稈冚珍珠！提到網民反應熱烈，Bella尷尬地說：「放假去日本旅行，喺當地浸溫泉，所以先影靚相甫吓。我都估唔到大家好大反應，有啲留言令我好尷尬，例如話睇相睇到流鼻血，叫我再少啲布更好，又叫我拍節目咁樣着。」