莎蓮睇唔到揮手小Celine失落早走

【鍾沛霖澳門直擊】重量級天后莎蓮迪安（Celine Dion）前晚於威尼斯人金光綜藝館展開一連兩場巡唱騷，吸引大批粉絲撐場。現場先有實力派歌手Veronic Dicaire獻唱多位女歌手的大熱歌曲暖場，莎蓮則以Sharp爆金色服飾上陣，以《The Power of Love》晒唱功揭開序幕，聽到粉絲如癡如醉！

跳到飛甩皮帶

台上演出精彩，台下還有另一亮點，去年於美國真人騷節目演唱莎蓮粉絲的「會歌」、《鐵達尼號》（Titanic）主題曲《My Heart Will Go On》而成名的小Celine，與家人坐於中場靚位睇偶像表演，更一度走到頭排向又唱又跳的莎蓮揮手。不過，專注演出的莎蓮似乎未有留意到台下粉絲，更一度跳到忘形飛甩皮帶，小Celine最後乖乖跟媽媽返埋位，未幾未睇晒個騷，母女於Encore前便離場，未有聽到莎蓮最後臨尾親身唱「會歌」，是為了趕入後台見偶像還是失望而回呢？

莎蓮	Celine	Celine在頭排不停揮手，可惜「人牆」阻擋令莎蓮睇佢唔到。

莎蓮全晚瞓身晒功架，換足五套高貴靚衫示人，演繹多首Hit爆金曲，包括經典動畫《美女與野獸》（Beauty and the Beast）的同名主題曲與《Because You Loved Me》，又翻唱人氣慘情歌《All by Myself》及Prince的《Purple Rain》等，唱出多個完美高音位，獲粉絲連番拍掌！她亦有開口冧粉絲，除以廣東話講「大家好」外，還不惜自嘲「資歷老」，多謝粉絲支持近30年，並多次邀請大家合唱：「我要帶埋你哋去巡唱！」

莎蓮唱歌氣聚丹田，邊跳邊運氣連皮帶都甩埋。

莎蓮換足五套高貴靚衫示人。

扮狗吠工作人員

講到女歌手Pink為她作曲悼念亡夫時，台下觀眾即時歡呼，莎蓮幽默地說：「冷靜啲！佢（Pink）今晚冇嚟！可能Miss咗班機啦，我唔知！」當工作人員幫手除無線咪令她有感不適時，她突然扮嬲扮狗吠，場面搞笑，最後對方成功除咪，她即送香吻補飛，好不風騷！