麥明詩識異性要避忌倍感孤獨
藝人麥明詩 （Louisa）挾「十優港姐」名銜，甫出道已備受矚目，但成名背後，換來的卻是「憂慮」，就算講一句真心說話，也害怕被攻擊成「博出位」，甚至面對新結識的異性，說話也變得戰戰兢兢，怕私事被外傳。面對種種壓力，Louisa坦言曾向家人哭訴，但慢慢明白自己不能滿足所有人，做足本分已足夠！
Louisa入行三年，她坦言娛樂圈跟當初想像的不太一樣：「選港姐時未清楚之後嘅路向，冇刻意諗喺呢行發展，但原來呢行好多喜與悲，喜嘅係同唔同演員合作，係一個好滿足嘅感覺，好Enjoy；悲係好多壓力，俗語有講『人怕出名豬怕肥』，今日喺一個香港人都認識、好幸運嘅位置，但都有好多壓力，例如感情上，自己唔準備嘅時候畀人知道咗，私人關係、公司立場，比我想像中有好多事情要處理。」她直言藝人身份成為結識男友的障礙：「我同普通朋友食飯，對方可能有女朋友或老婆，被影到咪影響到其他人，咁就有所避忌。識男仔方面我都會擔心，因為識一個人，當然係由唔識去到識，你根本唔知點樣去信任呢個人，保護自己多咗。」
「好似講咩都錯」
Louisa自言以前是有話直說的人，但現在與人溝通變得小心翼翼，不敢周圍跟人提及私事，因為怕對方會傳出去：「呢方面都覺得有啲孤獨嘅，行外人又未必明白，學習自己承受。」講到出道至今，人氣一直高企，屢次成為新聞人物，Louisa表示當初不懂怎樣應對：「觀眾情緒其實好難捉摸，好似講咩都係錯，有啲嘢唔講又話唔夠膽講，講咗又話言論博出位，其實好難滿足咁多人意願，惟有盡量去做自己，但又唔可以一味做自己而唔理觀眾感受。」所以她會吸納所有人意見，讓自己做得更好。
怕被觀眾遺忘
正所謂「花無百日紅」，Louisa深明這個道理：「一定要抵受高潮低潮，因為人氣冇可能長期高企，係要有啲休養時光，或者觀眾想去留意其他人，藝人想人留意自己係人之常情，但處理唔到自己心態，變到倚賴咗別人畀你嘅注視，將自己擺入自我懷疑嘅狀態，呢個心理好危險。」原來她亦曾害怕觀眾會不喜歡自己，尤其她是清談節目《後生仔傾吓偈》主持之一，很擔心其言論，觀眾會不接受，更擔心沒有劇集出街的日子，會被觀眾遺忘。
壓力大向家人哭訴
面對沉重壓力，Louisa表示試過對家人哭訴：「屋企人冇嚇親，知我鍾意喊，係一個減壓方式，叫我唔好做呢行，媽咪話我畀自己太大壓力，佢同我講，其實人生唔係話你做咗呢行，就冇一個出路，如果唔開心，總有一個選擇可以放低呢啲嘢。」幸好Louisa已逐漸釋懷，認為一切應該隨遇而安。不過，有彈當然有讚，亦有很多觀眾喜歡她夠「貼地」，對此她笑說：「其實我絕對冇資格走偶像派，自己都想喺觀眾面前暢所欲言，唔係特別去塑造『自然』、『好真』呢啲形象，做藝人好多時對住觀眾，咁多時間工作，計過度過就唔Enjoy。」
藝人表面光鮮亮麗，背後可能要「捱麵包」，問到經濟狀況，Louisa坦言這方面是幸福的：「屋企唔會太多壓力，當然都會有，唔可以冇家用，出面講到藝人收入好低，的確我知有呢個耕耘階段，好彩我呢個階段比較短，好快已經有活動出席，可以維持生計，我個心定啲，可以Plan長遠啲投資吓。」她謂未試過向家人借錢：「因為公司有畀基本收入，自己唔大使，藝人有個福利就係衫、袋可以借到，我父母好節儉，佢哋都係打工仔要供樓。」
貪靚仔想搵圈外人
除了工作，後生女重視的當然是拍拖，問到多不多圈中人追求？Louisa表示：「大家後生仔一齊溝通吓都有，但我自己就想同行外人多啲溝通，因為平時做嘢都見到同事，唔想自己講嚟講去都係影視娛樂話題，咁對人嘅思維會狹窄。」至於有何擇偶條件？她指外貌吸引是額外獎勵：「我主要希望傾到偈，氹到我笑，分擔到我憂慮，我又可以明白佢想法同夢想，係深層次嘅了解，始終外貌對多一排就冇咁靚。」
若然對方各方面條件都符合，但因為要追夢而需要她經濟資助？Louisa笑說：「咁要睇潛力，始終希望第時小朋友唔使有憂慮，可以去旅行、去外國讀書，畀到我細個都有嘅嘢，希望大家一齊努力建立家庭，而唔係單方面。」不過她補充現時工作行先：「除非對方好正，令我覺得蘇州過後冇艇搭，咁我就會拍拖。」
後記 :親切夠真
「十優港姐」Louisa讀書成績高分，在待人接物方面，她同樣優越，總給人平易近人的感覺，最可貴是這份親切感，絕不是刻意營造出來，而是渾然天成，娛樂圈已經充斥住「官方答案」，大家不妨少一點批評，多一點讚美，讓藝人保持一份「真心」。
髮型：Tim Chan@Hair
服裝：Tommy Hilfiger
場地：Mini Hotel