鄧穎芝苦遊大峽谷過足癮
歌手鄧穎芝（Vangie）身兼健身教練，早前獲運動品牌安排到美國洛杉磯訓練，難得圈外男友特地飛到美國陪她，就多留兩星期周圍暢遊，最難忘是到大峽谷遊覽，蔚為奇觀，令她大開眼界！一直好鍾意美國文化的她，希望下次有機會再到美國旅遊，她說：「因為有啲景點只係遊覽咗小部分。」她在拉斯維加斯有入賭場玩，笑說：「好好運，我贏番個旅費番嚟。」
打卡熱點「塗鴉街」：Melrose Avenue是美國洛杉磯一條好出名的街道，基本上旅客都會到這裏打卡，因為這條街有好多塗鴉，還有好多Shopping地方及餐廳。
羚羊峽谷：除了大峽谷，另一個羚羊峽谷同樣是鄧穎芝恨去好耐的景點，看到天然巨石是大自然造成，讓她畢生難忘。
馬蹄灣峽谷：相中圓形的巨石就像馬蹄，所以有馬蹄灣峽谷之稱，鄧穎芝說：「我坐喺石邊影相都好驚有意外，因為導遊話好多人掛住自拍，失足跌落去，所以我影完相，好快爬起身去番安全地方。」
大峽谷國家公園：拉斯維加斯的大峽谷國家公園，真的非常壯觀，亦是今次鄧穎芝到美國之旅的目的，她說：「我好想親眼睇一次，雖然每日要坐好耐車先去到，但係值得嘅，不過因為溫差大，洛杉磯廿幾度天氣好好，我一直以為拉斯維加斯嘅天氣差不多，點知一入夜得番零下一、二度，因為帶唔夠衫，所以覺得好辛苦。」
洗衣店打躉飲嘢：每次去到美國，鄧穎芝都好鍾意幫趁這種洗衣店，她笑說：「因為喺香港好少自己洗衫，而且一班人坐喺度等洗衫好搞笑，所以我好鍾意去洗衣店打躉飲吓嘢。」
博物館欣賞藝術：鄧穎芝每次去旅行必定會去博物館參觀，因為好鍾意欣賞當地藝術，而這個博物館比較新派。
「肌肉沙灘」睇日落：這是Venice Beach，別名Muscle Beach，因為沙灘上有好多不同形式的運動可以做，例如健身，而沙灘側邊亦有好多健身中心，好多大隻佬到來做運動，所以叫「肌肉沙灘」，在這個沙灘睇日落更是超靚。
人氣Burger店擦餐飽：In-N-Out是加州的人氣Burger店，每個到加州的朋友必定會幫襯，而相中這個芝士煙肉薯條，雖然餐牌上是沒有的，但若特別Order，店員都會整畀你食！
公路打觔斗：這條「66公路」是由洛杉磯去拉斯維加斯必經的，不過這條舊公路已經好少車用，因為當地興建了很多新公路，比較闊，所以她能在駕駛休息期間，停在公路上打觔斗。
拉斯維加斯玩兩手：鄧穎芝難得到拉斯維加斯，當然要入去玩番兩手，贏咗唔少，連個旅費都贏埋番嚟，真係非常Lucky！