姚子羚約姊妹濕平逼港鐵
無綫藝人姚子羚與有米男友「的士邦」分手後，即回復「貼地」生活。前日她出席活動後與李施嬅、趙希洛到中環醫肚，之後齊齊逼港鐵去銅鑼灣行街。雖然有好姊妹相伴，但子羚依然冇心機頭耷耷，但見到記者即變面笑晒！
37歲的姚子羚與男友鄭子邦相戀期間，於男方位於赤柱紅山半島的豪宅共賦同居，感情穩定，甚至屢傳婚訊，不過早前卻突然爆出三年情玩完。以前出入有司機接載的她，甩拖後即打回原狀。
怕被人認出
前日子羚在中環出席新劇的宣傳活動後，約好姊妹李施嬅和趙希洛到附近餐廳醫肚。席上見她們邊食邊傾，但子羚看似心事重重，全程冇表情，笑容欠奉，眾人逗留個多小時後埋單走人。期間子羚巧遇相熟男友人，站在街頭寒暄了幾句後，三女繼續在附近行街。由於當時人來人往，戴着Cap帽的子羚似怕被人認出，全程頭耷耷，但當發現有記者拍照，原本冇厘心機的她即揮手打招呼，更變面露笑容，其後趙希洛先行離開。
雖然正值下班的繁忙時間，但子羚與施嬅選擇搭港鐵往銅鑼灣逛超市，兩女主要選購飲品，不時手指指，但睇完一輪冇幫襯。其後她們再往附近店舖買飲品，極速飲完繼續在商場閒逛。