劉心悠怕同港男拍拖學粗口
馬浚偉及劉心悠前晚到銅鑼灣出席劇集飯局，合照時馬浚偉捉住女方握手恭賀，令她面都紅晒！廣東話捱批的心悠希望上堂學習，並乘機識教授，怕如果由男朋友教她會變成學粗口。
無綫劇《宮心計2深宮計》演員馬浚偉、劉心悠、謝雪心、羅霖、康華、張文慈及袁潔儀等前晚到銅鑼灣出席飯局，席間公布劇集至今在內地視頻國粵雙語播放量突破17億。
被馬浚偉搞到面紅
心悠與馬浚偉握手合照時面紅耳熱，馬浚偉笑說：「劇入面佢做公主，我咪扮領導人捉住佢隻手不停咁握手，唔知點解佢面紅，反而搭膊頭影相又冇面紅喎，哈哈。」
心悠表示稍後有時間想上堂學廣東話，乘機認識教授：「都知道有啲人話聽唔清楚，同埋話我有口音，所以好想去學廣東話，拍拖學不如讀報紙仲實際，我驚拍拖會學識好多粗口，可能上堂識到啲教授呢！」
馬浚偉卻催促心悠找個男友學廣東話會更快：「我啲廣東話都好標準，其實佢已經講得好好，劇入面啲對白就算香港長大都未必講到，何況佢喺台灣長大，當然雞蛋裏挑骨頭就一定可以更好。」他又稱：「胡定欣嚟唔到，因為要幫舞台劇練水袖舞，好欣賞佢嗰份堅持，完咗舞台劇一定會畀封大利是獎勵佢。」
張文慈呻供樓辛苦
另外，有指張文慈擁兩個物業市值二千萬元，她表示：「嗰層居屋係好多年前我同細佬一齊住開，但因為細佬結婚之後有埋BB就唔夠住，之後我將自己層樓向銀行再加按，然後再買層樓畀細佬住，當係幫補細佬，依家仲供緊，因為加按，供嘅數目亦會多咗，並唔係乜嘢富婆，捱得好辛苦就真。」提到她於劇中表現獲網民讚賞，她直言收到劇本時已深深感動，得到大家認同當然開心。