狄龍困俊彥籠入狗籠道歉解心結

藝人譚俊彥（Shaun）及父親狄龍早前拍攝節目《爸爸的告白》，大談心事。狄龍認為能與兒子一起工作是他的理想，Shaun則揭露父親當年的「非一般」教仔方法！

百厭仔唔知驚

Shaun憶述：「我細個嘅時候，有一日爸爸揸車返屋企，咁啱收音機播緊一單突發新聞，爸爸聽緊嘅，但我貪玩將卡式帶推入機度聽兒歌，爸爸熄番，我又開番，來來回回好幾次，爸爸就同我講『你再撳我就困你入狗籠裏面！』當時我心諗『大我咋！』就繼續撳，結果返到屋企佢真係困咗我入狗籠！」當時狄龍家中養了一隻都柏文犬，Shaun被困在狗籠超過半小時，懼怕程度可想而知，他說：「隻都柏文好惡o架！我真係驚，出番嚟之後仲發燒。」

狄龍對這段往事充滿歉疚，直言是心中的一道疤痕，節目中向兒子誠心道歉：「係爸爸唔啱，對唔住！」兩父子解開心結，揚言以後不會再提「狗籠事件」。

揣摩育兒妙法

Shaun昨日接受訪問，透露當年被困狗籠年約五、六歲，兩父子亦曾談過此事，理解父親當時仍在學習如何為人父：「佢當年湊我嘅時間比較少，冇人一生出嚟就識做爸爸，都會有唔識處理嘅時候，加上爺爺好早過咗身，爸爸冇感受太多父愛。呢件事發生後，佢都有後悔，亦有喺節目同我講對唔住，但其實唔使，依家我囡囡曳曳，我都會叫佢去Naughty Room（冷靜房），我都學習緊做稱職嘅爸爸。」