許志安中冧把降唔敢張揚

歌手許志安（安仔）受訪分享理財心得，自嘲在投資方面「郁啲就驚」：「有啲公公婆婆唔驚o架喎，明明股災就嚟，佢哋會話『咁就正啦，要買』，好樂觀！見到佢哋嘅神情有種安慰作用。」他分享中「冧把降」的慘況，自爆當時聽到一個股票編號就買不停：「明明跌都覺得咁就仲好，唔死得算好！（蝕咗過百萬？）咁又冇咁瘋狂。」他笑稱「中降」後絕不會告訴他人，因此逃過被太太責怪！

山埃貼士 認清朋友

說到自此對「冧把降」免疫，安仔認為理性分析很重要：「可以傳到我耳邊嘅消息，其實都幾唔秘密。同埋如果你朋友見到升咗60%先講，咁就衡量到呢個朋友值唔值得交。如果已經升咗3倍，佢仲叫你買，你真係要同佢絕交，刪除佢電話號碼，最多下次畀番個微信佢！」

早前出席DBS星展銀行iWealth® app發布會後，他坦言投資與唱歌、演戲一樣，一定要專心才會成功：「當然依家方便啲，揸住手機都可以知道理財動向同埋睇資訊。就算唔買，同人傾偈都要知道依家發生緊咩事。呢啲幾好玩，我嘅興趣都大。」

在股票市場交過學費，許志安拒將瘀事向家人透露。	早前到加拿大開騷的安仔，乘機歎吓慢活的生活方式。	許志安滿肚密圈，希望作出更多新嘗試。

享受慢活 無意移民

之前安仔到加拿大舉行慈善演唱會，順道與親人享受天倫之樂，安仔形容雙方生活大有不同：「我喺嗰度行得好慢，如果我喺銅鑼灣咁行，就會畀人拍片擺上網，話點解呢個傻佬行得咁慢！」他表示習慣了香港的節奏和喜歡新鮮事物，加上家人、朋友和歌迷都在香港，即使喜歡當地，亦沒打算退休後移民：「我有好多嘢冇做過，例如舞台劇、編劇，可以不斷嘗試。」問到之後的工作安排，他就透露下半年會推出新廣東歌：「仲傾緊啲電視、電影劇本，如果落實就要拍兩、三個月。（爭視帝、影帝？）好似好遠喎，做好自己先！」