梁烈唯操到嘔 「恐怖」大翻身

梁烈唯由以往在《飛虎》系列中演狙擊手，變為《飛虎之潛行極戰》的反派Kenny，雖然享受做奸角，但初時的確會擔心，但與邵氏高層樂易玲傾談後，認為要有新突破，故接受挑戰，「相信佢費咗一啲唇舌去說服監製去信任我。我又唔覺得呢個角色比其他搶，每個角色都有功能，先會令到成件事出嚟更加圓滿。」

唯唯在劇中的笑容令人感到心寒，他多謝兩位編導的指導和意見，又指角色與自己真實一面有一段距離，投入角色後，每次回家前都要先讓自己冷靜下。

不敢拍危險鏡頭

由於角色要騷手臂、肌肉，唯唯用了三個月時間，以飲食調節和刻苦鍛煉，將身體推到史無前例的狀態：「拍完《飛虎2》呢幾年保持住140磅，直至我拍《潛行極戰》將140磅拋開，啲肌肉愈大舊磅數愈重。（辛苦成點？）基本上一定會嘔，又會面青口唇白同頭暈。」

去年八月拍攝一場撞車戲份時受傷，唯唯腳傷依然未愈，他直言：「仲醫緊，之前盆骨、腰骨、頸椎骨、胸椎骨有啲歪咗，首先要移番正，跟住再慢慢等個椎間盤縮番入去，仲做緊物理治療。」今次事件令唯唯蒙上陰影，不敢再於新片中拍攝危險動作戲。

曾飽受批評的唯唯，經歷過一段黑暗日子。	唯唯相當黑仔，受傷乃家常便飯。	梁烈唯以另類手法演恐怖分子，大受好評。

一盤散沙冇方向

早年遭受網民抨擊，令事業低沉，問到當時可有為生活而擔憂？唯唯說：「嗰陣唔係低沉，直情係打沉，將梁烈唯打碎打散咗，直頭一盤散沙冇咗去向，直頭覺得要轉行，有諗過做茶餐廳。好彩嗰時好多商家老闆畀機會，仍然可以維持到基本開支。而之後《迷》同《同盟》出街收視好好，先開始對自己有番啲信心。」