葉翠翠就生得老公陪睇戲減壓

即將臨盆的葉翠翠，日前佗着巨肚現身商場。

懷有第二胎的前港姐葉翠翠臨盆在即，現時肚已大到不得了，早前她忽然肚痛「作動」，原來只是誤會。日前她被發現挺着巨肚在金鐘出巡，只見身穿碎花大肚裙的她與老公周曉東現身商場，翠翠步履較慢，但精神不錯，周曉東全程拖實太太，認真Sweet爆。二人行到戲院大堂後即換票入場，欣賞近期熱爆的恐龍電影，散場後即驅車返歸。

今胎佗得辛苦

據悉，醫生指刻下翠翠胎兒已足磅，肚大令活動難自如，難怪她近兩月深居簡出。今趟周曉東陪太太「出巡」，其實是想氹愛妻開心，替她減壓，認真體貼！事後記者致電翠翠，她說：「係呀，依家喺屋企坐又辛苦、瞓喺度又辛苦，佗得比上次辛苦，上次個肚冇咁大，加上要照顧囝囝同家人嘅起居飲食，所以我最多只係周末落街陪囝囝游水咋。（老公陪出街睇戲？）佢一早訂咗飛，不過入到戲院BB郁得好犀利，好彩老公坐喺隔籬，我先唔擔心咋。」翠翠揚言「兩個夠晒數」，她說：「因為唔想假手於人，想自己湊番，所以打算生埋今胎就封肚。」

搭扶手電梯時，葉翠翠老公一直從後傍實。

葉翠翠挽實老公手臂去睇戲。

冇點奶奶做嘢

由於要照顧家庭，翠翠約一個月前因太倦致身體不適，醫生叮囑要「瞓床」，幸最終無大礙。問到早前與家人慶祝母親節，卻被寫成「當家人阿四」，翠翠無奈說：「當時係陪奶奶買咖啡機，老公話唔想送貨，奶奶話都唔係好重，佢主動要自己拎。期間我發現有位，指畀奶奶睇叫佢去坐吓，點知就被寫成『指奶奶做嘢』，問心真係有啲唔開心囉。」