陳家樂與余香凝拍拖多年經常在網上放閃，卻突傳分手，令到身邊的朋友大感愕然！
身為余香凝好姊妹的廖子妤力撐對方：「佢係好獨立、好顧家嘅女仔，好早就賺錢養家。」她早就知兩人分手：「佢喺分手時期係好掙扎同難過，感覺到佢係好無力，我見證住佢哋戀愛，佢喺呢段情付出好多，好為對方着想，喺生活上好多細節佢係照顧住，當然家樂都有付出好多，雙方都好努力經營呢段關係，所以就片面之詞去指摘佢，係非常之唔公平，我好心痛佢既要頻撲兼顧工作又好堅強。」
余香凝妹妹余潔滢說：「家姐同家樂分手，我一早知道，佢哋之間不存在第三者，佢哋為咗分手呢件事，已經好唔開心，希望大家畀多啲空間佢哋去解決處理，佢哋工作都好忙；同埋家姐絕對唔係一個拜金嘅女仔，認識佢嘅人都知道，佢唔會係啲咁嘅人。」
衛詩雅說：「睇到呢單新聞，非常愕然，因為無耐之前，仲見到佢哋好開心，佢哋都係成年人，應該知道點樣去解決，唔好畀咁大壓力佢哋，見到家樂咁，我都好心痛，希望佢快啲振作番！」
被問到可有關心好友陳家樂？湯怡變得嚴肅自稱全不知情，睇報道才得悉：「冇刻意去問佢發生咩事，如果佢想傾訴都會樂意聽。」之前家樂睇她主演的《某日某月》時哭着離場，是否關分手一事？她說：「我局外人費事回應咁多，等佢哋兩個回應番。（有冇同佢傾感情事？）冇呀！」
陳詩欣說：「感情係兩個人嘅事，作為外人唔可以評論咁多、干涉咁多，希望佢哋以後幸福快樂，以我認識嘅余香凝絕對唔係拜金女仔，希望件事快啲雨過天青！」