無綫發「禁波令」高Ling馮盈盈冇眼睇

四年一度的國際足球盛事世界盃將於明晚舉行揭幕戰，過往無綫曾多次取得本地獨家轉播權，即使未能取得播放權，國際足協規定必定要有指定場數在免費頻道播出，無綫亦會請來嘉賓及「世界妹」講波炒熱足球氣氛。不過，今年香港區由nowTV取得播放權，部分賽事則在ViuTV免費播出，換言之無綫今年不會轉播任何世界盃賽事。

不准玩足球遊戲

無綫近年約六月底至七月初都會以「Amazing Summer」名義推出一系列特備節目，今年為迎戰世界盃，特別提早於明日開動，硬撼對台！據知，為免「長他人志氣」，無綫內部發出「禁波令」，全面禁止在節目及活動上出現足球，例如宣傳活動上不准玩有關足球的遊戲，務求淡化足球味。

「Amazing Summer」由6月中殺到9月，將推出精彩劇集及充滿夏日氣氛的綜藝節目，不過「限奶令」未有改變，一眾女藝員依然不會騷胸搶收視，玩水着節目亦會外加T恤。對於ViuTV當中十多場賽事都在晚上8時轉播，撞正黃金時段，而該段時間無綫播放處境劇《開心速遞》及重頭劇《宮心計2深宮計》，無綫對「戰況」信心十足，因《宮》劇正進入下半部戲肉，至於《開》劇的搞笑劇情則深得大批Fans支持。即使ViuTV最近找來林敏驄及梁漢文主持世界盃前哨節目《Good Night Show全民星戰》造勢，無綫亦不擔心世界盃播出後會受威脅。

高Ling忙拍劇，連瞓覺時間都唔夠，邊得閒睇波？	林子善自言唔係球迷，甚少睇波。	李佳芯直言會配合公司政策，但亦不想錯過球壇盛事。

李佳芯諗計睇決賽

一眾無綫藝員均表示會配合公司決定，高Ling指即將開劇，拍劇時間日夜顛倒，睡眠時間不足，相信冇時間睇波！馮盈盈則說：「我唔係好忠實球迷，越位點解都要上網睇解釋，所以對我冇影響，同埋我要拍劇，啲賽事撞晒開工時間，睇唔到。」林子善說：「我作為小演員都係拍好劇配合宣傳，同埋本身我唔睇波o架！」湯洛雯向來不太留意運動，所以相信限制對她冇影響。至於李佳芯（Ali）表示工作層面會配合公司，「唔會無啦啦拎個足球出嚟。」不過做體育節目出身的她，都會支持四年一度的盛事，搵方法睇決賽。

已離巢的郭晉安及楊怡笑言，重臨TVB充滿親切感。

無綫推出新劇《天命》吸引劇迷，刺激收視。

無綫副總經理（節目及製作）杜之克受訪時，表示每年暑假都是廣告高峰期，「Amazing Summer」計劃主要吸引廣告客戶，問到今年提早兩星期開動，是否硬撼世界盃開鑼？他說：「唔係直接關係，因為今年廣告旺季提早咗，我哋都係跟市場走。」