Chilam撐魔童做「板王」鎮宇仔想變網紅
演員張智霖（Chilam）及吳鎮宇近年合作無間，早前拉隊到馬來西亞拍戲，寓工作於娛樂，四出訪尋美食。為新戲宣傳期間，二人齊齊大爆兒子們的「秘密」，鎮宇直指9歲的兒子Feynman想做網紅。
Chilam與鎮宇合演電影《洩密者們》，二人已合作多次，可謂默契十足。這對好拍檔同是好爸爸，但原來鎮宇的兒子Feynman與Chilam兒子魔童，至今仍「素未謀面」，Chilam有信心二人「啱玩」，計劃稍後暑假相約一聚。
爆囝囝重磅
鎮宇及Chilam各自爆出兒子的「秘密」，原來Feynman志願是當網紅，而魔童則希望成為著名的滑板專家，鎮宇更指Feynman饞嘴，至今體重已達100磅，與較他年長兩歲的魔童比較，身形可謂「蚊髀與牛髀」﹗
早前二人拉隊到馬國拍攝《洩》片外景，Chilam與鎮宇搞笑指拍得「相當辛苦」：「係個胃好辛苦呀！日日好多嘢食，正所謂靠山食山，淨係當地出名嘅榴槤品種好似『黃飛鴻』、『十三姨』我哋都試過晒，肥咗幾磅返嚟呀﹗」
死記馬拉話對白
戲內Chilam「處男下海」，要背誦馬拉話對白，他自言向難度挑戰兼被考起：「馬來西亞話唔似韓文同日文咁，啲語音可以『有路捉』，我都係靠當地翻譯幫手，然後死記咋！我本身都算有啲語言天分，但今次都搞唔掂，試過一句對白拍足2、30個Take，依家我一句馬拉話都唔記得嘞。」他倆寄望《洩》片受歡迎，可以伸延故事變作系列電影。
吳鎮宇
髮型：Joe Kwong
化妝：Kargo Leung
張智霖
髮型：Vic Kwan@ii Alchemy
化妝：Hetty Kwong
服飾：Hugo Boss
場地：馬哥孛羅香港酒店