家有萬能河東獅 樊少皇揸實JJ冇得輸！
開講有話：「就算係一張廁紙，一條底褲都有佢本身嘅用處。」照咁睇，JJ賈曉晨同老公「力王」樊少皇的確係一凹一凸，完美組合。數到JJ嘅能耐，即係網民所講嘅「JJability」，又點只《美女廚房》第一代美女廚神、《獎門人》吹乒乓波現高潮眼咁簡單，JJ不但外形辣、煮嘢辣，把口更加辣，除咗貼張囡囡相都同網民開拖外，仲試過喺內地淨係用條脷，就搞到一班膽正命平嘅路霸硬不起來謝晒皮，憑住三寸不爛之舌相夫教女，喺一個父權社會中當老公仔咁湊，堪稱多功能老婆、逆權師奶。
幸福男惹葡萄
反觀力王雖然有沙煲咁大個拳頭，但實際上係扶不上壁嘅阿斗，感情問題唔識處理，理財能力亦都零雞蛋，如果唔係佢喺不惑之年終於識得揸實JJ唔放，睇怕家陣都仲係過住吊兒郎當嘅生活，點似得依家有個對外巴辣、對內賢淑嘅好老婆，加埋生咗個萌爆囡囡，成個幸福小男人嘅人辦咁羨煞旁人呀！如果唔係JJ無端勾起條筋爆佢老公細個同後生時啲瘀嘢，真係令人有錯覺以為力王係含住金鎖匙出世添呀！
咁又係嘅，學似JJ喺網度自爆，力王啱啱成年嗰時同過一個大佢好多嘅女人發生關係，講到當年好似「蒙頭入閘」咁不情願，真係隔住個Mon都feel到嗰個女人嘅憤恨呀！其實睇力王當年喺電視台後樓梯同藝員仔梁榮忠講數爭奪傅明憲，就知佢係徹頭徹尾嘅「兵」，只要睇吓佢揀咩級數嘅人做對手就知，呢啲嘢冇得呃人。即使後來婚都冇結，就做咗一仔一女嘅老竇，一啲都唔令人意外，做「兵」嘅唔通好似做「將」咁有晒全盤作戰計劃？梗係煮到埋嚟就食，聽命其他人o架喇！
為夫維權發聲
就好似力王細細個就要聽從佢老爸樊梅生吩咐，要成為繼成龍、李連杰之後嘅國際巨星，所以唔係做主角嘅戲唔接，除咗練功拍戲、做老爸嘅裙腳仔外，成個童年亦冇乜歡樂可言，更加冇乜同女仔玩嘅經驗，結果大個咪畀女仔玩囉，仲因為後生細仔就已經有咗家庭負累，打亂晒老爸將佢栽培成材嘅計劃，搞到斷絕父子關係，二十年來嚴重抑鬱，自殺無數次，即使係由JJ講番出嚟都係咁感人肺腑。呢啲明明係屬於自己嘅辛酸，但就由人哋把口講出嚟，睇怕只有律師為當事人求情至會咁做囉。
不過力王就算被JJ爆幾多瘀事都依然咁冧豬，唔嬲不特止，仲試過因為老婆鍾意食蜂蜜蛋糕，所以放低大男人身段走去學整添。計Nuts哥話，力王整餅真係整得過呀，事關之前被指欠落街數嗰劑，如果唔係JJ企出嚟為老公維權發聲，大嗌：「我老公冇爭人錢。」體現咗「好佬怕爛佬，爛佬怕麻煩」嘅道理，試問街數又如何一筆清呢？
Nuts哥