范文雅愈姣愈開心噴血邪花

華姐出身的范文雅樣靚身材正，不時在網上派福利圖冧爆宅男，早前她在處境劇《開心速遞》中穿緊身裙晒火辣Body，接着又在《棟仁的時光》晒事業線，令男Fans噴晒鼻血，在討論區關注度甚高！

準備捱觀眾鬧

入行以來多數做主持的Aliya去年開始獲安排拍劇，作品今年陸續播出，首先是在《棟》劇中飾演傻更更秘書，主動向袁偉豪示愛，並獻出螢幕初吻，她說：「角色都幾似我，但我就冇試過主動約男仔，好多人讚呢個角色正面可愛，估唔到得幾集戲都有咁大回響，好開心。」她透露之後的劇集也有咀戲，兼且愈咀愈激，笑言起初會覺得尷尬，但愈咀愈得心應手！

Aliya又預告《棟》中角色已是最正經可愛，之後在《BB來了》、《包青天再起風雲》及《特技人》中分別飾演狐狸精、妓女及壞女人，已有心理準備會被觀眾鬧爆：「喺《BB來了》入面我做高海寧、黃長興第三者，耍好多手段拆散佢哋，仲要喺長興面前除衫色誘佢，當時我只係穿Girdle，都有啲怕醜！（點睇連演幾個唔正經角色？）我幾鍾意做反派喎！我個樣好斯文咁，講嘢又細細聲，都想畀人見到我唔同嘅一面。」

有李佳芯作為借鏡，范文雅安心做壞女人。

華姐出身的范文雅，於網上人氣甚高，深得宅男鍾愛。

不介意被標籤

講到李佳芯早年憑演邪花角色上位，Aliya直言不介意被標籤做「新一代邪花」，她說：「如果有個封號都唔錯呀！我覺得係讚，我冇特別想行咩路，係咁啱多咗幾個壞女人角色，原來我可以咁姣咁邪，幾開心，如果好似李佳芯之前咁嘅路線都幾好吖！」

服裝：snidelhk

髮型：Jay @ HAiR

場地：Nexus Bar & Restaurant．Centre de Vin

鳴謝：Barry @ relaxdearhk

文：立影

攝：吳文聰