七年之癢？丁可欣甩拖：唔想勉強維繫
由網紅「火雞姐」搖身變為歌手的丁可欣（Yanki），剛推出新歌《So What？》的她，正準備另一首關於分手的新歌，更是其親身經歷。她與舞蹈員男友拍拖近七年，一直感情要好，但原來於兩個月前分手。Yanki受訪時透露因雙方步伐不一致：「唔想勉強維繫一段感情，佢對我嚟講係一個重要嘅人，陪我經歷太多嘢，佢對我好好，只不過有時我想聽番自己個心，選擇自己最想行嘅嗰一步。」
她嘆說原來不是每段感情都有理想結果：「但唔代表嗰段感情係冇意義囉！佢幫我面對咗好多困難。（七年之癢？）一直冇諗過分開，唔知係咪呢一、兩年我太了解自己。」她否認做歌手後拉遠兩人距離：「唔關事，五、六年前一齊做Dancers，都算係半個娛樂圈人，反而係各自對人生有新嘅憧憬，遲啲聽首歌就知。」
