黎明東莞開騷孫敬安搞團撐場
早前榮升爸爸的天王黎明，已答允8月在東莞開騷，是他做老竇後首次開騷，黎明一班忠實粉絲近日瘋狂打聽，得知是由黎明好友馬天尼娛樂集團董事長孫敬安主辦，即不停在孫敬安的Facebook留言查詢，孫敬安說：「其實30年前，我已經想搵黎明喺紅館開第一次演唱會，當年有好多人唔睇好，我就睇好喇！不過後來因為某啲原因而舉辦唔到，到依家終於夢想成真。今次係黎明首次到東莞開演唱會，一定會做得好好，啲粉絲知道後都好開心，不停喺我Facebook追問，因為佢哋好多唔熟路！」
妻女唔同行
是次《2018年黎明中國巡迴演唱會》將於8月25日在東莞舉行，為方便粉絲，孫敬安想出與永安旅行社合作，舉辦一日或兩日團去睇騷，粉絲反應熱列，不消兩日經已額滿！孫敬安又讚內地效率高，文化批文5日內便辦妥成功批出，令整個團隊大為振奮，事事親力親為的他，已先後到東莞開了多次會議及視察可容納萬人的場館。問到黎明一家三口會否同場出現？他表示應該不會：「黎明公還公、私還私，分得好清楚。」並透露是次的舞台燈光採用巡演器材，效果理想，叫粉絲拭目以待！
