《火熱動感La La La》重唱鬧雙胞

當年Hit爆K房的《火熱動感La La La》，由當時同屬華星唱片的郭富城、許志安及梁漢文等合唱，1992年推出時熱爆一時，多年來曾被不少歌手表演過，直至26年後的今天仍Hit爆，更巧合地有兩間唱片公司夢想沙龍及天盟娛樂公司翻唱，發生鬧雙胞事件！兩間公司更不約而同於昨日宣傳，其中夢想沙龍歌手蔚雨芯、馬天佑、陳嘉茵及男子組合ReVe日前到台灣拍《火熱動感》MV，昨日他們廣發宣傳相，似有意搶天盟旗下歌手包括女子組合Bingo、BOP、楊斯捷等昨日重拍《火熱動感La La La》MV的風頭！

周杰倫班底助陣

對於鬧雙胞一事，夢想沙龍發言人民迪表示，歌曲版權連製作費、機票及酒店食宿等合共逾100萬，公司亦重本邀請周杰倫御用MV導演珍妮美執導，還有麥秋成做舞指，他說：「因為今年已經係2018年，公司想歌曲有新元素，所以就喺歌名刪除咗《La La La》。（鬧雙胞？）係良性競爭，跳舞歌已經好難做，開心香港仲有人支持，鬧雙胞唔會嬲，我哋班底好強！」

Bingo昨日拍MV，埋怨跳到大髀痹。	放大圖片	唱慣快歌的BOP，跳舞冇難度。

「原汁原味」取勝

而天盟娛樂執行董事林偉漢則表示知道夢想沙龍都有翻唱此曲，不介意鬧雙胞：「各有各做、百花齊放，雖然我哋冇喺台灣拍MV，但製作費都差唔多過100萬！」並自覺其版本較「原汁原味」：「因為呢首歌係當年由我哋公司董事陳欣健搵返嚟，況且我哋個歌名一樣，仲搵番當年排舞師Sunny Wong重新編排舞蹈。同埋呢首歌喺去年陳欣健嘅演唱會已經表演過，只係今日再拍MV啫！」而Bingo昨日拍MV時，成員Carman指Sunny刻意加高難度動作給她們：「佢要我哋踎低，兩次之後我哋大髀都痹晒！」問到可擔心被拿來跟原版比較？她們認為有機會與前輩相提並論是開心及榮幸的事。

文：音樂組