趙哲妤跑數籌藥費 9蚊方包分兩餐
單親媽媽唔易做！母兼父職的女星趙哲妤（Uny）密食當三番，中港兩邊走，為不幸患有弱聽的女兒小魚，每月狂撲五位數的生活費及醫藥費！慳得一蚊得一蚊，昔日名牌包包車輪轉的她，如今舊款手袋照用，半磅9蚊的方包分兩餐食，兩母女分甘同味！
前中國小姐Uny於2016年未婚誕下囡囡小魚，女兒生父不聞不問，湊女一職由她一力承擔。現在一歲多的小魚，去年被發現左耳有弱聽問題，要開刀做人工耳蝸植入手術，惟非一勞永逸，隨着年紀漸長，需要很多相關儀器及電池換置，加上要接受言語治療訓練等，每月支出龐大，為幫助女兒而修讀言語治療課程的Uny，同時也要中港兩地走密密做為女撲水！
數百元Job照接
雖然Uny為跑數而不時出席活動，但據知為維持人氣及保持跟客戶的關係，有時會自我犧牲捱義氣，少至僅數千元甚至數百元都照接，以保長做長有。有見自己在內地有市場，情願北上登台、剪綵及拍戲，同時更在內地出新歌，省卻唱別人的歌要付版權費！北上長途跋涉，身為路癡的她，返內地時未有聘請助手同行，情願慳錢坐火車，化妝髮型一手搞掂！
慳自己唔慳人！近日為內地電影擔任女主角的Uny，日前與囡囡及家傭現身紅磡火車站，當時手持幾年前舊款手袋的她，先到麵包店以9元買下半磅方
包，再到美食廣場行來行去，但看完一輪餐牌未有幫襯，和女兒坐在一旁默默吃方包，兩母女分甘同味！Uny吃了一塊，眉頭深鎖地把餘下的方包收好，留待下一餐食。之後，Uny抱住囡囡到閘口時，依依不捨將她交給家傭，又不斷錫囡囡道別，囡囡似乎知道媽媽要去工作，不捨地拉住媽媽的手袋，Uny即時眼濕濕。
弱聽影響學行學企
Uny接受本報電話訪問時直言：「白麵包好食，覺得健康啲！我努力賺錢同慳錢係應該，錢要留畀個女。依家需要花更多心思去夾每星期嘅言語治療同其他治療，要見聽力學家等，自己每日會同佢訓練至少一個鐘，呢一兩年個女會再做手術。因為耳仔影響，佢平衡力會差啲，學企學行會慢少少。」
文：專案組
攝：攝影組