黃浩然一拖二安全至上
藝人黃浩然日前化身湊仔公，帶住兩個囝囝到中環上興趣班，他更全程拖到實，免得細仔亂走衝出馬路。另外，慈父張繼聰同樣「一對二」，他前晚在社交網上載一張餵子女食飯的溫馨照片，冧到爆！
現年42歲的黃浩然，2005年與拍拖四年的富貴女友莫家嘉拉埋天窗，現時育有兩個分別7歲和5歲的兒子Kayden和Ransley，雖然二人結婚已踏入第13年，但至今仍非常恩愛，浩然更經常在社交網「放閃」。
(目及)實細仔四圍走
最近忙於拍攝無綫新劇《多功能老婆》的浩然，日前趁不用開工，帶埋細仔去接哥哥放學。當日下午3時半，浩然湊住兩個寶貝仔現身中環，等過紅綠燈時他左右開弓拖實兩個囝囝，安全至上。其後三父子行至附近便利店，浩然選購了一些零食及飲品給囝囝，當他排隊付款時，大仔全程跟住爸爸，但細仔突然自己行開四圍望，心急的浩然邊畀錢邊(目及)住細仔一舉一動。由於便利店對開是馬路，為免Ransley跑出馬路，浩然付款後即上前「捉仔」，而大仔就乖乖走在爸爸前面，三父子齊齊步往該處一幢商廈上興趣班。
周志康拋高囡囡
而同樣已為人父的張繼聰，前晚在社交網上載一張邊抱住囡囡邊餵大仔食飯的溫馨照片，張繼聰Man爆留言：「母親節母親們負責快樂！其他嘢我頂晒！」看來老婆謝安琪可以在母親節放假一天。另外，周志康近日與圈外太太Emily帶囡囡到泰國旅行，Emily在社交網分享在酒店泳池玩水的靚相，可見周志康負責照顧囡囡，還玩「拋高高」遊戲，氹得囡囡超開心！
文、攝：追蹤組