Harry：我要搬嚟香港！

Harry前晚於香港會展開騷，演唱會原定8時開始，但他於暖場嘉賓表演後仍未見影，最後於9時15分左右出場，隨即演唱新歌炒熱氣氛，晒靚樣靚聲後，急急賣口乖冧番粉絲，除多謝大家撐場，更出動甜度十足的金句：「我今晚得一樣工作，就係娛樂你哋！」

單飛不久的他又感性多謝香港粉絲熱情歡迎：「對我好大意義，因為我只係出咗一隻碟，得10隻歌！」他全晚共唱17首歌，除有單飛歌，亦唱出不少1D的Hit歌包括《What Makes You Beautiful》，粉絲High爆合唱！

此外，Harry問候現場的外籍粉絲時，發現有不少人來自家鄉倫敦，包括定居香港21年的女粉絲，當個個粉絲都話定居香港好開心，他即說：「我都要搬嚟香港！」引來粉絲瘋狂歡呼！

尾排變頭排湧到台前

其後他加碼送驚喜，行到控制台後的小舞台演唱，本身坐於全場最後排看台區的粉絲，突然由尾排變頭排，興奮到湧到舞台前跳唱！他又為生日的工作人員唱生日歌慶祝，場面Warm爆。完場時，他接過粉絲帶來、象徵同志平權的彩虹旗，曾傳是雙性戀的他，毫不避嫌大方撐平權！

文：外娛組