宣萱巨型珍珠鏈引古仔目不轉睛
金像影帝古天樂昨晚孖住老拍檔宣萱出席珠寶活動，被對方「大抽」頸鏈所吸引，笑指公然（目及）胸，又讚宣萱又瘦又靚，惟慘遭伊人寸他假，更揚言身上總值800萬珠寶對古仔來說濕濕碎，令連環被窒的古仔無力招架。
古天樂、宣萱、李佳芯、林夏薇、童愛玲、貝安琪、利嘉兒等嘉賓昨晚出席「MIKIMOTO 125周年高級珠寶展覽」活動，老友鬼鬼的古仔與宣萱甫見面即互窒對方，眼見宣萱心口前的大型頸鏈，古仔起初賣口乖讚頸鏈「又大抽又靚」，同時也不忘讚宣萱又瘦又靚，氹得伊人開心不已，但未幾便指今次奉旨望宣萱胸部，因為目標（頸鏈）太大，令宣萱哭笑不得，笑言以往也曾獲古仔稱讚，但語氣與現時一樣假。
宣萱戴上品牌的「Praise to Nature」高級珠寶系列的珍珠頸鏈等，總值800萬港元，古仔即吞口水，沒料卻遭宣萱取笑：「呢啲對你嚟講好少，當跌咗啦！我想古仔送佢身上個扣針畀我，碎石都開心，物輕情義重嘛。」
影帝叫拍檔教戲
談到二人將合作拍電影，宣萱表示會待旅行返港後才入組，問到與「升呢」影帝的古仔合作會否緊張？她說：「唔理佢啦！都識咗咁多年，到時叫佢教我做戲囉。佢電影經驗比我多，我就拍電視多，好在今次戲份冇粗暴嘢，因為好驚受傷。之前喺內地拍危險動作時，隻手會拎住馬、兔同老虎玉吊墜，今年犯太歲，戴咗會心安啲。」
古仔對於近日被指有新歡，他一如過往答案：「唔係事實唔回應，我都想知幾時有。」宣萱聞言即揶揄他：「呢個唔係新歡係舊愛。」古仔無奈說：「費事睬你！」
文：影視組