何傲兒玩暗戀男女都啱！
藝人何傲兒（Lily）讀書時經常出沒尖沙咀區，無論是放學後的聚腳地或是課外活動唱聖詩，甚至還上演過巴士情緣，可惜膽小的Lily暗戀了異校男生一年半，也不敢開口表白，雖然戀情無疾而終，但總算經歷過情竇初開的滋味，令她回味至今。
何傲兒以前家住九龍城，但在尖沙咀補習，所以在該區留下不少足印，滿載少女時代的美好回憶。Lily當年在學校中雖然不算活躍分子，但酷愛音樂的她是合唱團成員，每年聖誕都會與一大班同學到尖東的噴水池唱聖詩，她說：「大家會着住校服、戴住聖誕帽報佳音，有次喺尖沙咀其中一間酒店唱歌，職員仲送咗個手掌咁大嘅薑餅人畀我，開心到唔捨得食。到依家我仲記得啲歌詞。」
小學戰友Friend到依家
提到唱歌，Lily試過與同學一齊參加歌唱比賽，勇奪第二名：「我哋係唱《女校男生》，同我一齊比賽嘅同學，我哋由小學一年級開學就認識，一直到依家都係好朋友。當年好興Twins啲歌，我記得有次上音樂堂阿Sir問乜嘢係大過天o架，佢係想講音階，但我哋成班同學一齊答係戀愛大過天，阿Sir聽到都笑咗出嚟。」
青春十五十六時，當時少不了令人面紅耳熱的戀愛經歷，不過Lily自認膽小，所以讀書時只會暗戀別人，從未敢開口表白，柏麗大道巴士站就是她與暗戀對象相遇的地方，令她印象難忘：「我放學搭巴士，經常會同一個男仔同一個時間搭同一班車，佢同我唔同校，我成日都會偷望佢，暗戀咗年半，但最後都冇講過嘢。我仲記得佢好高大，係書生型。」
讀完書終嘗初戀滋味
原來男生以外，就讀女校的她也曾暗戀女生：「我暗戀嘅女仔係隔籬班，佢音樂好叻，係學校風頭躉，佢唔係好男性化，但好有暖男感覺。我暗戀人唔會講出口，因為冇呢個勇氣，怕畀人拒絕，所以好多時都無疾而終。」她坦言求學時未有拍拖，直至出來工作才首嘗初戀滋味。
默書出貓
雖然Lily給人乖乖女印象，不過，也有古靈精怪的一面。尖沙咀碼頭是她經常與同學聚腳的地方，試過一班同學在碼頭分享她自創的美食「朱古力粥」，她說：「其實係工人姐姐發明，因為我發燒但唔肯食白粥，佢就將阿華田加入白粥入面，我可以食兩碗，所以我就將呢樣嘢煮畀同學食。」她稱小時候甚有創意，還自製過雪糕撈飯，將雲呢拿雪糕加杏仁再加飯，是她的獨門秘方。
做「大膽」騷嗌好玩
除了食物，Lily在出貓方面亦創意十足，她舉例說：「試過默書，我會將部MP3放喺冷衫入面扮托頭，其實聽緊個內容，又試過喺本默書簿上先用冇色嘅原子筆寫一次，老師遠睇唔覺，但自己近睇就見到啲痕迹。」
不止學生時代的回憶，Lily首次做司儀也是在尖沙咀區的1881，擔任農曆新年花車巡遊的主持，她不禁說：「我覺得公司同自己都好大膽，我未做過司儀，一做就做咁大型節目，仲要做足四個鐘，用中、英、國語做直播。雖然唔可以講做得OK，但做得好開心，嗰時仲細唔識驚，覺得好好玩。」又笑言公司可能覺得她表現尚可，可以呃到人，之後為她接到外面的主持工作。
文：影視組
攝：張福宏
髮型：Dave Wong@IL COLPO Platinum